Nagpaandam ang Regional Anti-Cybercrime Unit (RACU) VI nga maghalong batok sa mga karelasyon nga nagakuha sang video sa tion sang intimate moments ukon mga pagpakighilawas.
Kasunod ini sang nadakpan sa Iloilo City nga isa ka 29-anyos nga lalaki nga ginaalegar nagapang-engganyo sa mga menor de edad nga babaye nga mag-upod sa iya kag magpakighilawas kabaylo sang kwarta, apang sa ulihi, gina-upload sini ang video sa online adult website.
Gindakop ini sang otoridad kag ginpasakaan sang kaso nga paglapas sa Anti-Online Sexual Abuse or Exploitation of Children kag Anti-Child Sexual Abuse or Exploitation of Materials.
Sa interview sang Bombo Radyo kay Police Colonel Richard Habawel, Chief sang Regional Anti-Cybercrime Unit (RACU) 6, iya ginpahayag nga indi dapat mag-engage ilabi na ang mga menor de edad sa sini nga sahi sang relasyon.
Suno kay Habawel, ini nga videos ang posible magamit sa indi husto nga mga bagay ukon iligal nga buluhaton kaangay sang pag-post sini online.
Ginpahanumdom man sini sa mga ginikanan nga i-monitor gid ang ila mga kabataan ilabi na ang ila aktibidad sa social media.
Nahibaluan nga ang online sexual abuse or exploitation of children kag ang child sexual abuse or exploitation of materials ang naga-violate sa dignidad, safety, kag bwasdamlag sang isa ka bata.
Nagalakip ini sang pag-produce, pag-share, ukon pag-angkon sang ano man nga sexualized image ukon material nga naga-involve sang minors — online man ukon offline.
