ILOILO CITY – Magapatigayon sang motu proprio investigation ang Regional Internal Affairs Services 6 sa Muller-Britanico case.
Sa interview sang Bombo Radyo kay Police Major Manny Manuel, pinuno sang Regional Internal Affairs Services 6, iya ginpahayag nga padayon subong ang pagtipon sang ebidensya sa natabo nga twin shooting incident.
Suno kay Manuel, nagdesisyon ang pamilya Britanico nga magdangop sa Office of the Ombudsman ukon sa National Police Commission central office para sa pagpasaka sang kaso administratibo batok sa duha ka pulis nga sanday Police Corporal Jerry Villanueva kag Police Corporal Joseph Andrew Joven.
Ginpahayag ni Manuel nga magapakig-angot pa sila sa pamilya Muller tuhoy sa motu proprio investigation apang mahimo nga dal-on na lang ang kaso ni Allain Muller bangud nga may kaangtanan man ini sa pagpatay kay Delfin Britanico.
May kaangtanan diri, hands-off ukon indi na magpahilabot sa kaso ang National Police Commission Region 6.
Sa pagpaathag ni Atty. Joseph Celis, Director sang National Police Commission Region 6, wala nakapakig-angot sa iya ang pamilya sang mga biktima kag mahimo nga ang central office na ang maga-uyat sang kaso.
Sa pihak sini, nagpahayag naman sang kahandaan si Atty. Celis sa tion nga kinahanglanon ang bulig sang National Police Commission Region 6.
