Ginhangkat ni Manila 6th district Rep. Bienvenido Abante Jr. sanday Senator Ronald Bato Dela Rosa kag Senator Bong Go nga magtambong sa House quadcomm hearing nga maga-resume sa Nobyembre 6.
Suno kay Abante, magluwas kanday Dela Rosa kag Go, nagalaum siya nga mag-upod man si anay presidente Rodrigo Duterte.
Ginpahayag ni Abante nga kun maisog ang nasambit nga mga senador kag kun nagapati sila nga wala sila sang sala, magpakita dapat sila sang matuod nga delicadeza kag magtambong sa hearings agud ma-challenge kag ma cross-examine ang ila pahayag.
Nagapati si Abante nga ang presensya nanday Go kag Bato sa Senate hearing ang nakaapekto sa kredibilidad sang mga Senado.
Pahayag pa ni Abante, kun may common sense si Bato, indi ini dapat mangin parte sang ano man nga imbestigasyon nga siya mismo ang involved.
Wala pa sang sabat diri kanday Dela Rosa kag Go.
Ginpanginwala naman ni Santa Rosa City Lone District Rep. Dan Fernandez nga co-chair man sa quadcom ang alegasyon ni Col. Hector Grijaldo nga ginpilit ini nanday Fernandez kag Abante nga kumpirmaron ang affidavit ni retired Police Col. Royina Garma tuhoy sa reward system sa Duterte drug war campaign.
Suno kay Fernandez, pinakadako nga kabutigan ini.
Pahayag ni Fernandez, ginpatawag si Grijaldo bangud si Garma mismo ang nagsiling sa ila nga masuportahan ni Grijaldo ang statement ni Garma tuhoy sa reward system kag wala nila ginhingyo nga magpirma ini sang ano man nga affidavit
Ginsiling naman ni Fernandez nga ang testimoniya ni Grijaldo sa Senado ang scripted kag ginsugo ni Dela Rosa.
