Mainit nga nagsabtanay sanday SAGIP Party List Representative Rodante Marcoleta kag Philippine Coast Guard Spokesperson Commodore Jay Tarriela kaangot sa isyu sa West Philippine Sea sa ginpatigayon nga hearing sang House tri-committee.
Ini may kaangtanan sa pahayag ni Tarriela natuhoy sa statement ni Marcoleta nga wala sang West Philippine Sea nga makit-an sa mapa.
Sa resumption sang House Tri Committee hearing may kaangtanan sa paglapta sang disinformation kag misinformation online, namangkot si Marcoleta tuhoy sa claims sa social media nga gintawag siya ni Tarriela nga traidor nga ginpanginwala naman sang PCG spokesperson.
Suno kay Tarriela, ini ang una nga tion nga ginpamangkot siya kun traidor ukon indi si Marcoleta.
Pahayag niya, wala siya sang obligasyon nga magsabat sa mga social media posts sang vloggers kag social media influencers kag suno sa iya, kun depensahan man niya ang mamalidha, mamalisyahan pa ini nga ginasuportahan niya ang opisyal nga nagakandidato subong sa pagka-senador.
Nagsabat naman si Marcoleta nga ang pag-athag sa isa ka butang ang indi pulitika kag ginpamangkot si Tariella kun ngaa importante sa iya ang pag-athag sang isa ka pahayag nga wala man naghalin sa iya baba.
Nagbalos naman si Tarriela nga nahibaluan lamang niya ini nga isyu amo ang sang tion nga nabatian niya ang interview nga gintawag siya nga gago kag mango ni Marcoleta kag wala sang rason nga depensahan niya ang tawo nga nagabuyayaw sa iya.
Depensa naman ni Marcoleta nga ang akto ni Tariella amo ang iya ginatumod kag indi ang PCG spokesperson mismo.
Gin-athag man niya nga ang iya statement sa West Philippine Sea ang natuhoy sa pagkinahanglan sang Pilipinas nga magrehistro sang pangalan nga ginhimo sini sa International Hydrographic Organization.
Apang para kay Tarriela, may yara na sang layi nga naga- establish sang West Philippine Sea.
Gintuad man ni Tarriela nga madamo sang mga pro-China trolls ang nag-ulhot nga nagagamit sang social media bilang pamaagi sa pagpalapta sang disinformation.
