Ginpasapubliko sang Presidential son kag House Majority Leader nga si Sandro Marcos nga may ara sang natabo nga pag-istoryahanay sa tunga ni Pres. Ferdinand Marcos Jr. kag anay president Rodrigo Duterte antes matabo ang eleksyon sang tuig 2022.
Suno kay Sandro, may mga indibidwal halin sa administrasyon ni Duterte nga nag-engganyo sa ila nga suportahan ang amay sini nga si President Ferdinand Marcos Jr. apang may ara sang kondisyon.
Pahayag pa sini nga gin-imbitaran pa si PBBM sa Malacañang samtang si Duterte pa ang nagapungko nga presidente.
Sa natabo nga meeting, wala magtambong si Duterte, apang nagpadala ini sang tinawo agud mag-istorya kay Marcos.
Suno pa sa presidential son nga igahatag ni Duterte ang suporta kay Marcos sa kondisyon nga tugutan sini nga si Duterte sa gihapon ang magapili sang mga opisyal nga igabutang sa matag-as nga posisyon.
Ini ginalakipan sang Executive Secretary, Speaker of the House, kag Senate President, kag iban pa.
Dugang pa ni Sandro nga pagkatapos nila nga maghalin sa Malacañang sang iya nga amay, nagtulukay pa ang mga ini kag ginsinggan siya sang iya amay nga tuman ka damo sang ginapangayo sang tinawo ni Duterte kag kulang nalang nga ipapatay ini.
