Gindepensahan sang isa ka former Junior Officer sang Philippine Army nga si Iloilo 5th District Rep. Raul “Boboy” Tupas ang Armed Forces of the Philippines sa tunga sang nagtuhaw nga mga isyu nga nagaangot sa organisasyon kadungan sang nagainit nga kinagamo sa politika.
Kasunod ini sang panawagan ni anay president Rodrigo Duterte sa military nga tadlungon ang “fractured governance” ni Presidente Ferdinand Marcos Jr.
Sa interview sang Bombo Radyo kay Iloilo 5th District Rep. Raul “Boboy” Tupas, iya ginpahayag nga indi pulitikal ang institusyon kag malayo sa patad nga magpaimpluwensiya ini sa sin-o man nga gamhanan nga tawo ukon opisyal.
Suno kay Tupas, tuman ka propesyonal ang militar bangud para sa konstitusyon ang loyalty sini kag para sa kaayuhan sang pumuluyo ang ila pagserbisyo.
Dugang ni Tupas, mataas ang integridad sang militar gani indi sila mahaylo sang sin-o man nga politiko.
Matandaan nga isa si Tupas sa nagabug-os sang Commission on Appointments (CA) nga nag-confirm sa appointment sang 22 Generals/Flag Officers kag Senior Officers sang Armed Forces of the Philippines (AFP) kahapon.
