Nanindugan ang Revolutionary Guards sang Iran nga indi nila pagbuksan ang Strait of Hormuz sa indi nila kaalyado ukon sa kaaway nila nga mga pungsod.
Ini amo ang ila mensahe matapos ang pagpamahog sang Presidente sang Estados Unidos nga si Donald Trump kun sa diin nagpahayag ini nga magapadayun ang gyera samtang wala pa nabuksan sang Iran ang Strait of Hormuz.
Suno pa sa Islamic Revolutionary Guard Corps (IRGC) Navy, sila sa gihapon ang may control sa nasambit nga strait rason nga wala sang shipping vessel sang Estados Unidos ang makalabay.
Nahibaluan nga nagapangabay man ang Pilipinas nga makonsiderar sang Iran nga “non-hostile country” ang pungsod agud nga hilway nga makaagi ang shipping vessels sang Pilipinas samtang nagapadayun pa ang tension sa Middle East.
