ILOILO CITY – Tuman ka dismayado ang Regional Inter-agency Task Force (RIATF) sa Overseas Workers Welfare Administration (OWWA), ang lead agency sang repatriation sang mga Ilonggo Overseas Filipino Workers (OFWs).
Sa interview sang Bombo Radyo kay Atty. Roy Villa, tagpamaba sang RIATF, iya ginpahayag nga daw kaangay nga nagapahigad lang ang amo nga ahensya, baliskad sa katungdanan sini.
Gintawag ni Villa nga ‘apa’ ang amo nga pamunuan bangud wala man ini naga-prangka sang sarang nga mahimo.
Ini ang isa man sa rason suno kay Villa kun ngaa nagpagwa sang resolution ang RIATF nga temporaryo anay nga isuspinde ang repatriation sang mga OFWs halin sa Metro Manila.
Suno kay Villa, kun indi handa ang lead agency, pat-od nga indi man mapatigayon ang mga lihok sa iban nga ahensya.
Mabudlay ang sitwasyon suno kay Villa bangud indi lang OFWs ang problema sang syudad.
Sa pagkamatuod suno sa iya, madamo pa sang Ilonggo workers nga ginakabig nga strandees sa iban nga lugar sa Pilipinas.
Magluwas diri, tuyo man sang amo nga resolution nga masigurado nga maid-id ang proseso sa Metro Manila antes pasugtan nga magbalik sa Iloilo ang mga strandees.
Luyag pat-uron sang pamunuan nga napaidalom sa rapid test ang mga strandees.
Sa mga panugda naman nga dal-on na sa tagsa ka local government unit sa probinsya sang Iloilo ang repatriates kag didto na ibutang sa ila tagsa ka isolation facility, ginpahayag ni Villa nga wala pa sang desisyon ang RIATF
Ini ang baliskad sa natabo sa iban nga mga probinsya sa rehiyon partikular na sa Capiz sa diin naghanda ang tagsa ka banwa para sa 14 ka adlaw nga quarantine sang mga OFWs.
Sa subong, sa isa ka hotel sa Iloilo City Proper ginpahamtang ang mga repatriates sang syudad kag probinsya.
