Umpisahan na sang Senado sa masunod nga semana ang inquiry kaangot sa road rage incidents sa pungsod lakip na ang natabo sa Quezon City kun sa diin involved ang isa ka anay pulis nga nagpahog sa isa ka cyclist.
Ang former police officer amo si Wilfredo Gonzales nga co-terminus employee sa opisina ni Supreme Court Associate Justice Ricardo Rosario apang ginpahalin man matapos ang insidente.
Suno kay Senate President Juan Miguel Zubiri, kinahanglan nga maghimo sang paagi agud nga indi na masulit ang road rage sa iban nga mga motorista.
Dapat suno kay Zubiri nga i-suspend gilayon ang driver’s license sang tawo nga involved sa road rage ukon mahimo man nga ma-revoke kun kinahanglanon.
Suno sa senate president, ang anay police officer nga si Gonzales nga nakit-an sa video ang naglapas sa pila ka layi lakip na ang nahimo sini nga abuse of authority kag grave threats.
Na-revoke na subong ang permit sang iya nga armas, kag nakumpiskar man sa iya nga possession ang tatlo ka iban pa nga armas. Nagpasaka man sang kaso ang Philippine National Police bangud sa alarms and scandals.
Nahibaluan nga 20 ka tuig man ini nga nag-serbisyo bilang pulis apang napahalin sang Office of the Ombudsman sang 2017 bangud sang grave misconduct sang nagkasa man ini sang pusil sang may nakabais. #
