Ginpalapitan ni Senator Robin Padilla si Senator Jinggoy Estrada kag ginhapulas ang likod sini agud nga i-comfort samtang yara sila sa plenaryo sang Senado kagab-i, Mayo 26.
Natabo ini samtang nagahambal sa mikropono si Sen. Erwin Tulfo kag nagakwestyon kun ginadalian bala sang majority nga amyendaran ang Senate rules bangud sang balita nga may duha ka kaupdanan nila nga magatupa sa presuhan subong nga semana.
“My question is, why are we in such a hurry? Why are they, the majority, in a hurry to tackle this motion and divide the House, Madam President?” suno kay Tulfo nga naga-address sa presiding officer nga si Sen. Loren Legarda.
“Or is it because they are in a hurry because of news reports that probably two of our colleagues might land in jail this weekend? Is that the reason why?” dugang ni Tulfo.
Wala ini sang may ginmensyonar nga pangalan apang sanday Estrada kag Sen. Joel Villanueva ang ginlawag sang Ombudsman nga posible kasuhan sang plunder sa Sandiganbayan bangud sa ginaalegar nga kahilabtanan sa flood control scandal.
Ang sentro sang debate kagab-i amo ang ginduso ni Sen. Rodante Marcoleta nga amyendaran ang pagsulundan sang upper chamber agud nga tugutan ang mga senador nga magboto ukon magpartisipar sa ila sesyon sa online lamang ukon paagi sa electronic platforms.
Wala natigayon ang binotohay sa amo nga mosyon bangud nag-walkout ang minority senators.#
