Ginsaway ni Senator-judge Erwin Tulfo ang spokesperson ni Vice President Sara Duterte nga si Atty. Salvador Paolo Panelo Jr.
Ini matapos gin-akusahan ni Panelo ang pila ka senator-judges sa impeachment trial nga nagapakita sang bias kag nagaakto bilang prosecutors sa pagpamangkot sa mga testigo sang depensa.
Suno kay Tulfo, ang ginhimo ni Panelo ang wala nagapakita sang respeto sa impeachment court.
Kasunod sini, gin-aprubahan sang impeachment court ang mosyon ni Tulfo nga padal-an sang show cause order si Atty. Paolo Panelo.
Gin-athag naman ni Presiding Officer Chiz Escudero nga indi sakop sang Rule 18 si Panelo bangud indi siya lawyer of record ukon testigo sa kaso.
Apang mahimo nga masakop siya sang Rule 71 sang Rules of Court kaangot sa contempt.
Ginmanduan na ang Clerk of Court nga ipagwa ang show cause order.














