Ginkuwestiyon sang pila ka senator-judges ang kredibilidad kag kwalipikasyon sang defense witness nga si Atty. Rainer Dela Fuente.
Sa impeachment trial kahapon nga adlaw, ginpresentar siya sang kampo ni Duterte agud usisaon kag kuwestiyonon ang mga natukiban sang financial forensic analyst nga si Atty. Alexander Cabrera.
Apang, nabuyagyag nga wala pa gali mabasa ni Atty. Dela Fuente ang forensic report nga nagalakip sang mga alegasyon nahanungod sa ginapahayag nga P817 milyon nga unexplained wealth ni Vice President Sara Duterte.
Bangud sini, ginpamangkot nanday Senator Raffy Tulfo kag Joel Villanueva kon paano niya mapamatud-an nga sala ang report kon wala niya ini nabasa kag naintindihan sang maayo.
Ginkuwestiyon man ni Senator Bam Aquino kun ngaa wala niya nabusisi ang mga rekord sa bangko nga ginpatawag gani ini sang impeachment court agud nga makahatag ini sang iya nga bahin.
Sa pihak sini, ginpaathag ni Dela Fuente nga ang iya katungdanan amo lamang ang pag-analisar sang mga ginpresentar ni Atty. Cabrera sa mga probisyon sang Anti-Money Laundering Act (AMLA).
Ginpasalig man niya nga indi kinahanglan basahon ang bug-os nga report agud mahibaluan kon nagasunod sa layi ang imbestigasyon nga ginpatigayon.














