Nag-resign na sa pwesto si Executive Secretary Vic Rodriguez, ang long-time lawyer kag spokesperson ni Presidente Ferdinand ‘Bongbong’ Marcos, Jr.
Ginkumpirma man sang Malacanang ang pagpanaog sa pwesto ni Rodriguez matapos ang matunog nga huring-huring subong nga semana.
Sa separado nga statement, ginpahayag ni Rodriguez nga magapadayon ini sa pagserbe sa idalom sang Marcos administration bangud siya ang magapungko bilang Presidential Chief of Staff.
Sa amo man nga statement, ginpasalamatan ni Rodriguez si Marcos sa pagsalig sini agud nga makapangalagad siya bilang executive secretary sa halos tatlo ka bulan.
Ang pag-resign ni Rodriguez sa Gabinete ang natabo sinemana matapos ang kontrobersiya nga nagapalibot sa sugar importation sa pungsod kun sa diin nadalahig ang iya pangalan.
Ang ginabati-bati subong nga magabulos bilang Executive Secretary amo si Retired Chief Justice Lucas Bersamin nga amo subong ang chairman sang Government Service Insurance System (GSIS) board of trustees.
Ginabati-bati man nga i-appoint si Bersamin bilang Executive Secretary agud nga indi na mag-atubang si Rodriguez sa Commission on Appointments (CA). Ini bangud ginapahayag nga mabudlayan ini nga makuha ang approval sang CA bangud sa mga dalagku nga kontrobersiya nga natabo sa temprano nga binulan sang Marcos administration.
Kun matandaan, sang Hulyo pa lang, antes ang una nga inaugural State of the Nation Address ni Presidente Marcos, ginabati-bati na nga maga-resign si Rodriguez bangud sa alleged pressure sa “inner circle” sang Marcos administration. Ginpanginwala sini ang amo nga alegasyon.
Ginpanginwala man sini nga nagapangayo siya sang P100 million sa mga indibidwal nga luyag mangin kabahin sang Marcos Government.
Sa bahin naman ni Bersamin nga amo ang matunog nga ginahuring-huring nga magabulos kay Rodriguez, sang tion nga siya ang chief justice, nagboto siya pabor sa pagpalubong kay late President Ferdinand Marcos Sr. sa Libingan ng mga Bayani.
