Handa nga atubangon sang anay House Speaker kag Leyte 1st District Rep. Martin Romualdez ang ginapatigayon nga preliminary investigation sang Office of the Ombudsman kaangot sa ginapahayag anomaliya sa mga flood control project.
Suno kay Atty. Ade Fajardo, abogado ni Romualdez, sabton sang kongresista ang tanan nga alegasyon batok sa iya apang nagapangabay ini sang isa ka patas nga proseso.
Pahayag pa ni Fajardo nga wala sang plano si Romualdez nga maghalin sa pungsod kag padayon sini nga ginatungdan ang mga responsibilidad sini bilang kongresista sa First District sang Leyte.
Dugang pa sang abogado sang kongresista nga wala sang nangin papel si Romualdez sa paghimo sang 2025 national budget magluwas lamang sang pagpirma sini.
Ginkwestyon man ni Fajardo ang kredibilidad sang 18 ka ginapahayag “maleta boys” nga kabahin sa mga testigo nga posible gamiton sa imbestigasyon sang Ombudsman.
Suno pa sa iya nga wala sang dapat nga patihan sa ila nga mga pahayag bangud ang Department of Justice mismo ang nag-file sang gina-alegar kaso nga perjury batok sa mga ini.
Isa ka pamatuod suno sa iya nga nagabinutig ang mga ini sa idalom sang ila nga ginsumpaan.
