ILOILO – Indi makabig nga crackdown ang natabo nga operasyon sang Regional Task Force on Ending Local Communist Armed Conflict sa probinsya sang Negros.
Sa interview sang Bombo Radyo kay Capt. Cenon Pancito III, tagapamaba sang 3rd Infantry Division sang Phiippine Army, iya ginpahayag nga law enforcement ang natabo nga operasyon kag nag-agi sa legal nga proseso ang pagkuha sang search warrants.
Suno kay Pancito, madugay na nga naga-eksister ang mga cause oriented groups apang wala para sa Philippine Army bangud wala man sila sang may ginahimo nga malain.
Ginpahayag ni Pancito nga bangud nakuhaan sang mga armas ang pipila ka cause oriented groups, nagakadapat lang nga ipatuman ang layi.
Santo sa pahayag ni Pancito, kun padayon nga maglapas sa layi ang cause oriented groups, magapadayon man ang law enforcement operations sang otoridad.
Madumduman nga gindakop ang 59 ka mga persona lakip man ang mga menor de edad sa ginpatigayon nga joint operations sang Philippine Army kag Philippine National Police sa talatapan sang Bayan Muna, Bagong Alyansang Makabayan, Gabriela, Kilusang Mayo Uno, Kadamay kag National Federation of Sugar Workers sa Negros.
