Naghiwat sang support mobilization ang Sambayanan Western Visayas sa Sunburst Park sa JM Basa Street, Iloilo City subong nga adlaw, Hulyo 27, bilang pagpakita sang suporta sa administrasyon ni Presidente Ferdinand Marcos Jr. kasunod sang iya ika-lima nga State of the Nation Address (SONA).
Ginpahayag sang grupo nga ang ila panguna nga mensahe amo ang pagpanawagan sa mga lider sang pungsod nga maghiliusa kag magpokus sa matuod nga serbisyo publiko agud mas epektibo nga masolbar ang mga problema nga ginaatubang sang mga Pilipino.
Sa interview sang Bombo Radyo kay Winefredo Doblizo Jr., Regional Director sang Sambayanan Western Visayas, iya ginpahayag nga madamo pa sang mga problema nga kinahanglan sang dalayon nga pagtamod ang gobyerno bangud may mga problema nga indi na makaya sang ordinaryo nga mga pumuluyo.
Suno kay Doblizo, ang pagbinahin-bahin sang mga lider nagahatag sang negatibo nga epekto sa pungsod kag nagapaluya sa implementasyon sang mga programa sang gobyerno.
Gindugang pa niya nga dapat mangin isa ang tanan nga opisyales sang gobyerno bilang mga public servant agud mas mapadasig ang paghatag sang serbisyo sa katawhan.
Ginpunto man niya nga ang korapsyon nagaapekto sa imahe sang gobyerno kag isa ini sa mga rason nga nagadula ang pagsalig sang mga pumuluyo sa mga institusyon sang estado.
Apang suno sa iya, may yara man sang mga programa nga ginapatuman sang national government, lakip na ang socio-civic project funds kag ang “Bawat Barangay Makikinabang Program,” nga mahimo pa gid mapalapad kon may pagbinuligay kag paghiliusa ang mga lider sang pungsod.
Samtang, nagpanawagan si Doblizo sa publiko nga magbulig sa gobyerno agud masiguro nga madinalag-on ang mga programa kag serbisyo nga ginapatuman para sa kaayuhan sang bug-os nga Pilipinas.
By: Bombo Cyrene Nasis
