Gin-athag sang San Miguel Municipal Police Station nga wala sang abduction nga natabo sa Brgy. Igtambo, San Miguel, Iloilo.
Ini kasunod sang ginapahayag pagsunod sang isa ka van sa tatlo ka mga kabataan samtang sila ang naga-jogging.
Sa interview sang Bombo Radyo kay Police Captain Zharra Dela Rosa, hepe sang San Miguel Municipal Police Station, iya ginpahayag nga nagpangita lang kontani sang baklan sang atchoy ang driver sang van.
Suno kay Dela Rosa, nagtuyo lamang nga i-approach sang driver ang kabataan apang na-confuse ang mga lamharon.
Gintu-ad man sini nga mahimo isa sa factor sang confusion sa kabataan amo bangud sa anay nagalapta nga mga impormasyon nga may nagapanakop sang mga kabataan.
Nagmando man ang natungdan sa kapulisan nga bisitahon ang pamilya sang mga menor-de-edad agud nga maka-set sang schedule agud makaatubangay sila nga kaupod ang driver sang van.
Nagalaum man ini nga maathagan ang publiko kag malikaw sa trauma ang natungdan nga mga lamharon.
Wala paman sang update kon ano ang mangin masunod nga tikang sang pamilya sang mga kabataan.
Gintuad naman sang indibidwal nga ginpangayo-an sang bulig sang tatlo ka mga kabataan nga ginsundan sang isa ka van nga una nga bes lang sini nga nakit-an ang van kag indi sini kilala ang driver.
Suno kay Jen Silao, ang ginpangayo-an sang bulig sang kabataan, iya ginpahayag nga sang nagdulog ang van, ginpanaog sini ang wind shield kag naghambal nga “dasig gid dalagan mo, nakulbaan gid kamo”.
Dugang sini nga tuman ang kakulba sang tatlo ka mga bata sang nakit-an sini.
Sang ginpamangkot naman sang natungdan ang kabataan, nagpahayag sila nga indi nila ini kakilala.
Gilayon naman nga ginpapauli ni Silao ang tatlo ka mga bata kasunod sang natabo.
Ginpahayag man sang natungdan nga may upod nga bata ang driver sa sulod sang van.
Wala naman napunggan sang duha sa tatlo ka mga lamharon nga magpabutyag sang kakugmat bangud sa insidente.
Nagalaum naman ang ginikanan sang mga menor-de-edad nga magserbe ini nga palaagyan agud mas pasangkaron sang kapulisan ang police visibility sa lugar.
