Gintugutan sang Sandiganbayan Fifth Division si former Department of Public Works and Highways (DPWH) Secretary Manuel Bonoan nga iga-confine sa Philippine National Police General Hospital sa Camp Crame.
Yara subong si Bonoan sa The Medical City suno sa iya nga mga abogado bangud sang angiogram procedure.
Una na ini naghingyo sa korte nga tugutan siya nga didto lang anay subong apisar nga may arrest warrant ini sa non-bailable case nga plunder.
Sa resolution sang anti-graft court, ginpahayag nga ang mga balatian ni Bonoan ang may pamatuod kaangay sang medical certifications kag records nga nagapatpat sang detalyado kag immunocompromised state sang anay opisyal.
Ginpahayag nga indi ini masarangan nga bulngon ukon i-manage samtang nga yara siya nakahunong sa regular jail facilities ukon sa malapit nga government hospitals.
“The court partially grants accused Bonoan’s motion,” suno sa seven-page resolution. “In here, accused Bonoan has established that his detention in a regular jail facility would pose a real, imminent and irreparable danger to his life.”
Ginmanduan man ang doktor sa PNP General Hospital nga magpasa sang independent medical evaluation kaangot sa kahimtangan ni Bonoan.
Samtang nga yara siya sa ospital, ipaidalom si Bonoan sa kustodiya sang Philippine National Police – Crime Investigation and Detection Group (PNP-CIDG).
Kun kinahanglan nga padayon nga i-confine si Bonoan, dapat nga maghatag ang PNP sang bi-weekly medical progress report tubtub nga mag-ayo na ini kag isaylo sa New Quezon City Jail sa Payatas, Quezon City.
Nahibaluan nga sa arraignment sang kaso, ginpahayag nga ang medical conditions ni Bonoan nagalakip sang acute coronary syndrome, heart failure, hypertension, Type 2 diabetes, CKD ukon chronic kidney disease, carcinoma, prostate cancer, kag spine pain.
Pareho sanday Bonoan kag Sen. Jinggoy Estrada nga may arrest warrant bangud sang P573-million plunder and graft cases nga naangot sa flood control anomalies.
Una na nga ginpanginwala nanday Bonoan kag Estrada ang mga alegasyon batok sa ila.#
