Ginakabig sang isa ka constitutional law expert nga umpisa pa lang sang mas malawig nga proseso ang pag-aresto kag pagpasaka sang kaso batok kay anay House Speaker Martin Romualdez may kaangtanan sa flood control anomaly.
Sa interview sang Bombo Radyo kay Atty. Michael Henry Yusingco, iya ginpahayag nga indi dapat makuntento ang publiko sa pag-aresto kay Romualdez bangod kinahanglan pa nga mapabakod ang kaso tubtob sa prosecution kag conviction sa Sandiganbayan.
Suno sa iya, kinahanglan man nga ma-usisa kag makita sang publiko ang complaint nga gin-file sa Sandiganbayan, lakip na ang mga ebidensya kag argumento nga igapresentar agud makita kon ano kakusog ang kaso kag indi lamang magresulta sa dismissal sa ulihi.
Ginpunto man sang abogado nga indi lang dapat makontento ang publiko nga isa lamang ka prominente nga personalidad ang napasakaan sang kaso, kundi dapat tanan nga indibidwal nga ginapahayag nalakip sa flood control scandal—big fish man ukon small fry—ang dapat maimbestigahan kag mapasakaan sang kaso kon may yara sang nagakaigo nga basehan.
Pahayag pa niya, indi dapat mamili ang Ombudsman kon sin-o lang ang pagasakaan sang kaso para lang mapakita nga may ginahimo ang ahensya.
Ginpunto man ni Atty. Yusingco, dapat masiguro nga mapanabat ang tanan nga may sala kag mabawi ang kwarta nga ginakabig gintakaw sa publiko.
Dugang pa niya, ang pag-aresto kay Romualdez ang isa lamang ka welcome development kag dapat bantayan sang publiko ang bug-os nga proseso tubtob mapanabat ang tanan nga mga kurap.
