Ginkumpirma ni Ombudsman Jesus Crispin Remulla nga mangin state witness si anay Department of Public Works and Highways ukon DPWH Secretary Manuel Bonoan.
Suno kay Remulla, nakapirma na si Bonoan sang kasugtanan nga magbulig sa gobyerno bilang state witness.
Nag-file man ang mga prosecutor sang mosyon sa Sandiganbayan agud mapaiway ang kaso batok sa sa anay tiglikom agud makatestigo siya sa flood control scandal.
Ginsiling sang Ombudsman nga importante gid ang testimonya ni Bonoan bangud daku ang iya nahibaluan parte sa operasyon sang DPWH nga mahimo makabulig sa pagpalig-on sang madamo nga kaso.
Pareho sanday Bonoan kag Estrada nga may arrest warrant bangud sang P573-million plunder and graft cases nga naangot sa flood control anomalies.
Suno sa mga piskal sang Ombudsman, may papel si Bonoan sa mga ginatawag nga “commitment fee” nga ginhatag kay Estrada nga ginapahayag nagpangayo sang kabug-usan nga pondo nga ₱855 milyon para sa mga proyekto sang flood control sa Bulacan.
Gin-akusahan man sang mga piskal si Bonoan nga may labot sa pagpili sang mga kontratista nga nakakuha sang nasambit nga mga proyekto.
Bangud nagdangat sa ₱855 milyon ang kabug-osan nga balor sang mga proyekto, ginpahayag sang mga state prosecutor nga nakabaton si Estrada sang 25 porsyento sini ukon indi magnubo sa ₱213.7 milyon.
Naka-schedule ang ila arraignment sa kaso nga plunder subong nga adlaw, Hunyo 30, sa Sandiganbayan Fifth Division.
Matandaan nga sa una nga bahin subong nga bulan, sa arraignment sang kaso nga graft nanday Bonoan kag Estrada, wala nakatambong si Bonoan.
Ginkwestyon man sa korte ang kadamuon sang iya medical conditions nga nagalakip sang acute coronary syndrome, heart failure, hypertension, Type 2 diabetes, CKD ukon chronic kidney disease, carcinoma, prostate cancer, kag spine pain.#
