Sandiganbayan, gin-deny ang motion ni Ang nga ibasura ang graft case

Ginbasura sang Sixth Division sang Sandiganbayan ang motion to quash nga gin-file ni USWAG Ilonggo party-list Representative James “Jojo” Ang.

Nagaatubang si Ang sang kaso nga graft may kaangtanan sa ginapahayag nga conflict of interest sa mga infrastructure project.

Sa resolusyon nga ginpagwa sang korte kahapon, Agusto 25, gin-reject ang pangabay ni Ang nga ipabasura ang kaso kag ibalik ang iya gin-post nga cash bond.

Sa argumento sang kongresista, ginsiling sini nga wala sang hurisdiksyon ang korte sa kaso.

Suno naman sa prosecution, may financial interest si Ang sa Allencon Development Corporation kun sa diin may yara siya sang 500 shares sang Marso 2023.

Gin-alegar man sang prosecution nga nakakuha ang kompanya sang P8.18-million nga kontrata halin sa Department of Public Works and Highways (DPWH) para sa mga road project sa Iloilo kag Antique.

Apang suno kay Ang, dapat Regional Trial Court (RTC) ang magdumala sang kaso bangod wala sang espesipiko nga kantidad sang damage sa gobyerno ukon alegasyon sang bribery.

Ginsiling sini nga ang P8.18 million nga balor nagapatuhoy sa total cost sang project kag indi amo ang specific quantified amount sang damage.

Suno naman sa Sandiganbayan, indi kinahanglan nga may direkta ukon materyal nga pagkadula sang kwarta agud mahulog sa hurisdiksyon sini ang mga kaso nga may kaangtanan sa serious malfeasance, misfeasance kag conflict of interest.

“Such non-mention of any amount of damage to the government, coupled with the accusation that the alleged prohibited act was done in violation of the Constitution and in contravention of public policy, would indicate that the resultant damage alleged in the Information is unquantifiable,” suno sa resolution.

“The crime charged in the present case is, thus, one which the Congress intended to remain under the exclusive original jurisdiction of the Sandiganbayan,” dugang sang anti-graft court.

Ginbasura man sang Sandiganbayan bangud sa kakulang sang merito ang motion for consolidation ukon ang pangabay ni Ang nga i-consolidate ang 14 counts sang graft cases.

Matandaan nga sang Hulyo 25 gin-file sang Ombudsman ang 14 ka separado nga counts sang graft batok kay Ang.#