𝗖𝗔𝗟𝗔𝗣𝗔𝗡 — Patay ang isa ka Southeast Asian (SEA) Games gold medalist matapos ginbuno sa dughan samtang nagakatulog sa Calapan City, Oriental Mindoro.
Ang biktima amo si Mervin Maligo Guarte, 33, miyembro sang Philippine Air Force kag naka-assign sa Fernando Airbase sa Lipa City.
Gindala pa si Guarte sa ospital, apang wala natabangan.
Natabo ang krimen sa balay sang abyan sang biktima nga si Barangay Kagawad Dante Abel sa Sitio Pinagkaisahan sa Barangay Camilmil, Calapan City, las 4:30 kaina sang kaagahon.
Suno kay Police LtCol. Roden Fulache, hepe sang Calapan City police, nagakatulog si Guarte sa sala sang balay ni Abel sang ginbuno sang wala pa makilal-an nga suspek.
Nakapangayo pa sang bulig ang biktima sa mga kasilingan nga nagdala sa iya sa Sta. Maria Village Hospital antes ginsaylo sa Mindoro Medical Center sa diin siya gindeklarar nga patay.
Nagwa sa imbestigasyon nga nagbisita lang ang biktima sa lugar kag nag-inom inom kagab-i tubtob las 3:00 kaina sang kaagahon.
Narekober sang mga imbestigador sa ginluntaran sang krimen ang kutsilyo nga ginamit sa pagpatay kay Guarte.
Ginpakamalaot naman ni Oriental Mindoro Governor Humerlito “Bonz” Dolor ang pagpatay kay Guarte kadungan sang panawagan sang hustisya.
“Hindi matitinag ang aming panawagan para sa katarungan at patuloy naming hinahangad na mapanagot ang mga responsible sa krimeng ito,” sabi ni Dolor sa isang Facebook post.
Ginmanduan man ni Governor Dolor si Oriental Mindoro Provincial Police Office Director Police Col. Edison Revita nga solbaron ang krimen.
Si Guarte ang gold medalist sang 2023 SEA Games para sa men’s team relay, 2019 SEA Games gold medalist para sa men’s 5km, 2011 SEA Games silver medalist para sa men’s 800m and 1500 m kag 2024 Spartan Asia Pacific Champion sa men’s beast 21 km.
