ILOILO CITY- Opisyal na nga ginbasura sang Senado ang People’s Initiative paagi sa ginpagwa nga manifesto nga pirmado sang 24 ka mga senador para pamatukan kag ikondenar ang people’s initiative bilang pamaagi sa pag-amyendar sa 1987 Constitution.
Ginbasa ni Senate President Juan Miguel Zubiri sa sesyon sang Senado ang manifesto nga natigayon isa ka adlaw matapos magsapol ang mga senador para talakayon ang tikang tuhoy sa Charter change ukon cha-cha.
Suno kay Zubiri, ginarespeto nila ang pumuluyo kag ang kinamatarung nga magpanawagan para sa Constitutional amendments apang kinahanglan nila nga protektahan ini batok sa sin-o man nga luyag bag-uhon ang Constitution paagi sa paghingalit sa demokratiko nga proseso kag gamiton ang people’s initiative.
Nabalaka ang mga senador nga matigayon ang cha-cha nga wala sang pagkumporme sang Senado sa people’s initiative.
Dugang niya, wala man sang ibato ang boto sang 24 ka mga senador kontra sa 316 nga kongresista kun tingubon ang pagboto sang Kamara kag Senado.
Gintawag man sa manifesto nga “ridiculous” nga kaksan sang papel ang Senado nga co-equal chamber sang Kamara.
Una naman ginpahayag ni House Speaker Martin Romualdez nga wala siya sang kahilabtanan sa pagtipon sang pirma para sa People’s Initiative.
Ginpasiguro man sang lider sang Kamara nga nagasanto sa kasuguan ang ano man nga tikang nga himuon kaangot sa mga rekomendasyon nga amyendaran ang konstitusyon.
