Gin-adoptar sang Senate Committee on Finance ang bersyon sang kamara sang P6.352-trillion General Appropriations Bill para sa 2025 nga nagaalokar sang P733 million para sa Office of the Vice President sa baylo nga P2 billion nga proposed sa National Expenditure Program.
Ini ang ginkumpirma ni Senator Grace Poe, ang chairperson sang finance panel, sa iya pagsponsor sa House Bill 10800 sa idalom sang Committee Report N0. 335 nga nagaunod sang 2025 General Appropriations Bill.
Suno kay Poe, nagpakig-angot sila sang makapila ka beses sa Office of the Vice President nga naga-request nga magpasa sang dokumento agud i- clarify ang mga isyu natuhoy sa ila budget apang wala gid nakapas ang OVP.
Ini ang rason suno kay Poe nga ginpabilin nila ang General Appropriations Bill amount samtang pending ang submission kag review sang sini nga mga dokumento.
Sang Septyembre sang gin-aprubahan sang kamara ang 2025 GAB sa third kag final reading.
Ginbuhinan sang kamara sang P1.29 billion ang proposed P2-billion budget sang OVP para sa 2025.
Nahibaluan nga subong nga adlaw, Nobyembre 6, magasugod ang plenary debates sa 2025 General Appropriations Bill.
