ILOILO CITY- Saksi ang isa ka sepulturero sa tumalagsahon nga hitabo sang gin-exhume ang bangkay sang ‘Servant of God’ nga si Amador Tajanlangit, Sr. ukon mas kilala sa hayo nga ‘Tay Amador’ nga amo ang ginatinguhaan sang simbahan nga ma-canonize agud mangin santo.
Sa interview sang Bombo Radyo kay Alejandro Ordaniel, iya ginpahayag nga sang 1992, isa siya sa mga sepulturero nga nagbukas sang panteon ni Tay Amador.
Suno sa iya, sang amo nga tion, tuman nga nagatigiti ang init apang sang nabutong na nila ang lungon, hinali lang nga naghandong kag nagtuhaw ang isa ka balangaw.
Pahayag niya, didto na nagsiniyagit ang mga tawo nga nagalantaw sa palibot sang patyo bangud sa indi kinaandan nga hitabo.
Magluwas diri, sang ginlantaw ang iya lawas, bilog sa gihapon ini kag wala gid nadunot.
