Ginpakamalaot ni Senate President Alan Peter Cayetano paagi sa isa ka Facebook live ang mga nagakatabo nga sunod-sunod nga pagpasaka sang kaso kag pag-aresto sa pila ka mga kaupod sini nga Senador sa Majority bloc.
Suno sa kay Cayetano nga ginagamit lamang ang mga kaso may kaangtanan sa mga infrastructure corruption scandal agud pahadlukon ang mga senador sa Senate Majority bloc.
Suno pa sa iya nga wala ini sang problema sa imbestigasyon ukon sa pagdesisyon sang korte, apang ginkwestyon sini ang paggamit sang mga kaso bilang political pressure.
Ini nga pahayag nagwa matapos ang sunod-sunod nga kaso batok sa pila ka myembro sang Majority.
Nahibaluan nga si Senator Jinggoy Estrada ginpasakaan sang arrest order sang Sandiganbayan bangud sa kaso nga plunder kaangot sa gina-alegar 355 milyon pesos nga budget insertions kun sa diin nakapiyansa ini gilayon.
Si Senator Joel Villanueva naman pagapasakaan man sang plunder case kaangot sa kaangay man nga eskandalo.
Samtang, si Senator Rodante Marcoleta, may ara sang preventive hold departure order bangud sa alegasyon sang bribery kag campaign donation anomalies.
Si Senator Francis ”Chiz” Escudero naman ang gindumilian man nga makahalin sa pungsod samtang gina-imbestigahan.
