Makabulig ang mga steel barriers nga ginpahamtang sang Traffic and Transportation Management Office ukon TTMO sa pagpahagan-hagan sang kagutok sang trapiko sa Iloilo City subong nga holiday rush.
Sa interview sang Bombo Radyo kay Retired Police Colonel Uldarico Garbanzos, ginapatuman ang pagbutang sang barriers agud ma-manage ang dalagan sang trapiko, ilabi na nga ginapaabot nga madamo sang mga selebrasyon kag bisita nga magakadto sa syudad sang Iloilo subong nga holiday season.
Gindugang pa ni Garbanzos nga ginapaabot man ang pagsaka sang pedestrian cases, ilabi na nga may mga tawo nga kun kis-a wala nagasunod sa ginapatuman nga traffic rules kag regulations.
Nagpanumdum man siya sa mga motorista nga sundon gid ang husto nga pag-uturn, kun sa diin ang inner lane lamang ang dapat okupahon, agud malikawan ang dugang nga kagutok sang trapiko.
Subong nga holiday season, yara sa full duty status ang mga traffic auxiliary kag iban pa nga personnel sang TTMO agud makabulig sa pagpatuman sang kaayusan sa dalan, ilabi na kun kinahanglanon.
Ginapangabay man sang otoridad ang kooperasyon sang publiko, nga maghalong sa pagpanakayan agud malikawan ang aksidente, sundon ang traffic signages kag rules, kag respetuhon ang mga traffic personnel nga naga-duty sa karsada.
