ILOILO CITY – Naglab-ot na sa 11 ang na record nga suicide incidents sa syudad sang Iloilo subong nga 2020.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City iya ginpahayag nga ang 11 ka suicide incidents ang na record humalin Enero tubtub subong nga Hunyo.
Kun lantawon ang percentage suno kay Sangrines, may posibilidad pa nga malapawan ang record sang 2019 nga naglab-ot lamang sa 14 sa bug-os na nga tuig.
May kaangtanan diri, ginpahayag ni Sangrines nga padayon man ang mga programa sang Philippine National Police may kaangtanan sa pagtapna sang depresyon nga nagatuga sang nanari-sari nga mental health problems.
Sang 2019, kalabanan sa mga biktima sang suicide amo ang mga lalaki kag nagapanguna sa pamaagi sang paghikog amo ang pagbitay sang ila kaugalingon.
