ILOILO CITY- Kulangon sang baboy ang probinsya sang Iloilo sa nagahilapit nga holiday season.
Ini ang ginkumpirma ni Iloilo Provincial Veterinarian Dr. Darel Tabuada kasunod sang pagnubo sang swine inventory sang probinsya.
Sa interview sang Bombo Radyo kay Dr. Tabuada, iya ginpahayag nga nagnubo sang 72.57 percent ang swine inventory sang probinsya — buot silingon 200,504 ka mga baboy ang nadula kag 76,917 na lang ang nabilin.
Bangud sa pagnubo sang swine inventory suno sa iya, nagnubo man ang sufficiency level sini.
Apang may yara sang iban nga probinsya kag rehiyon nga nagapasulod sang baboy sa Iloilo Province kag humalin sang Enero tubtob subong nga bulan, may yara sang 14,614 heads ang ginpadala sa probinsya.
Pahayag pa ni Dr. Tabuada, yara lang sa 33.75 percent ang sufficiency level sang probinsya kag tuman ini ka kulang bisan pa nga ipain ini sa pangkonsumo na lang sang mga tawo.
Ginalantaw sang natungdan nga madamo man ang nagasulod nga frozen products halin sa iban nga lugar kag may posibilidad nga mapun-an sini ang gap sa shortage sa inventory sang baboy.
Pabor man si Dr. Tabuada sa nangin pahayag sang Department of Agriculture nga mag-import sang baboy agud nga madugangan ang kulang sa probinsya tubtob nga maka-umoisa sa recovery program.
Sa tion nga maka-umpisa na sa recovery program dugang sang natungdan, amat-amat na nga i-regulate ini agud mabuhi ang farmers kag para sa ulihe magdamo ang supply sang baboy kag magbarato ang baligyaanay.
