Nadakpan sa banwa sang Bingawan ang isa ka lalaki nga ginatudlo nga suspek sa hit-and-run incident sa mag-asawa sa banwa sang Pavia sang tuig 2024.
Ginkilala ang suspek nga si Rudolf “Bobot” Chavez Dela Rosa, nga ginserbihan sang warrant of arrest sang personnel sang Bingawan Police Station bangud sa kaso nga attempted murder.
Sa interview sang Bombo Radyo kay Police Lieutenant Philip Girao, Officer-in-Charge sang Bingawan Police Station, ginpahayag sini nga ginserbe ang warrant of arrest kay Dela Rosa sang Hulyo 19.
Matapos ang iya pagdakop, ginturn-over ang suspek sa Police Station 5, kun sa diin may yara man ini sang isa pa ka existing warrant of arrest bangud sa kaso nga murder.
Suno kay Girao, nakabaton sila sang impormasyon nga nagakadto sa Bingawan ang suspek bangud may yara ini sang mga duta kag iban pa nga mga propedad sa nasambit nga banwa.
Ang pagdakop kay Dela Rosa may kaangtanan sa imbestigasyon sang hit-and-run incident sa isa ka mag-asawa sa Pavia sang tuig 2024.
Sa nasambit nga insidente, napatay ang bana samtang padayon nga ginbulong sa ospital ang iya asawa matapos mabungguan sang isa ka sports car nga ginapatihan nga ginamaneho sang suspek.
Padayon ang imbestigasyon sang kapulisan agud mapasakaan sang nagakaigo nga kaso ang suspek.
By: Bombo Ireca Pioquinto
