ALIMODIAN, ILOILO – Ginpasakaan na sang kaso nga murder ang lalaki nga nagbuno-patay sa 27-anyos nga lalaki nga iya ginapangimonan sa Alimodian, Iloilo.
Ang biktima amo si Luis Alim Jr. kag ang suspek naman amo si Jerry Almirante ginabanta 35 tubtob 40 anyos ang edad kag taga Barangay Cuyad sa nasambit nga banwa.
Sa interview sang Bombo Radyo kay PLt. Danilo Noca, hepe sang Alimodian Muncipal Police Station, iya ginpahayag nga samtang nagalakat ang biktima, ginpalapitan siya sang suspek nga dala nga kutsilyo kag ginbuno.
Suno kay Noca, igo sa nawala nga dughan, tuo nga liog, tuo kag likod nga bahin sang ulo ang naangkon sang biktima tuga sang pagpangbuno.
Dugang pa sang hepe, ginalantaw nga motibo sa krimen amo ang pagpangimon bangud ang biktima ang nagapangaluyag sa anay ka live in partner sang suspek.
