Gin-evacuate na sang otoridad ang 31 ka mga premature nga mga lapsag halin sa Al-Shifa hospital sa Gaza Strip.
Ginsakay ang mga bata sa ambulansya sang Palestinian Red Crescent kag ginpatigayon nga may koordinasyon sa World Health Organization (WHO) kag United Nations Office for the Coordination of Humanitarian Affairs.
Photo: AFP
Suno kay Mohammed Zaqut, director general sang mga ospital sa Gaza, kaupod sang 31 ka nga lapsag nga sayluhon sa Egypt amo ang tatlo ka mga doktor kag duha ka mga nurse.
Ini nga tikang ang ginpatigayon matapos ginatos man ka tawo ang naghalin sa amo nga ospital nga amo ang pinakadaku nga medical facility sa Gaza.
Una na nga ginlaragway sang WHO ang ospital nga isa na ka “death zone” matapos nga ginsulod ini sang militar sang Israel bangud ginpahayag nga ginpugaran ini sang Hamas militants.
Gin-report man sang joint United Nations humanitarian assessment team nga sang nagsulod sila sa Al-Shifa hospital, nagatambak ang medical kag solid waste sa alagyan kag may yara man sang mass grave sa entrance sang pasilidad. Ginabanta 80 ka mga bangkay ang yara sa amo nga lugar.
Antes ginbakwit ang premature babies, may nabilin pa nga 295 ka mga pasyente kag 25 ka health workers sa amo nga pasilidad suno sa WHO. #
