‘Tapos Na’: Istorya sang Ilonggo nga naghupot sang pagtuo sa pihak sang kapigaduhon

“Tapos na.” Para sa iban, nagakahulugan ini sang katapusan; apang para kay Jerson Alagao sang Sacred Heart Chaplaincy, Western Visayas Sanitarium, Sta. Barbara, Iloilo, ini nagakahulugan sang katumanan.

“Tapos na ang kabudlayan, ang gutom, ang kahadlok, ang pagduda. Natapos na ina nga kabuhi ko, pero indi ini ang katapusan. Ini ang sugod sang akon misyon,” panugiron sini sa iya repleksyon sa Siete Palabras sa Jaro Metropolitan Cathedral subong nga hapon, Abril 3.

Nagdaku si Jerson sa pigado nga pamilya. Naga-trabaho bilang construction worker ang iya amay samtang ang iya naman iloy amo ang naga-atipan sa anum sila nga mag-utod.

“Ang balay namon, para lang gid nga may mapuy-an. Gin-recycle nga mga materyales, kag amon atop daw dahon sang saging nga may mga buho-buho nga daw mga bituon sa aga,” pahayag sini samtang ginasugid ang ila kapigaduhon.

Apisar sang puraot nga kabuhi, ginhuptan sini ang iya handum nga mangin accountant.

May mga tion suno sa iya nga haluson na sila makakaon, naga-antos pa sa kalayuon sang ila eskwelahan, kag wala pa sang disente nga bag nga butangan sang iya panapton. Sa kolehiyo, tatlo tubtub apat ka jeep ang kinahanglan sini sakyan agud makaabot sa ila eskwelahan, kag may mga adlaw nga wala gid sang inughatag nga kwarta ang ila iloy.

Suno kay Jerson, kun kaisa, naga-tutor siya sa iya classmates agud nga may inugplete siya pauli.

“May tion nga kinahanglan ko na magpuli, wala gid ako sang kwarta. Kun magsakay ako sa jeep, nagapangamuyo na lang ako, ‘Lord, hatagi sang madamo nga pasahero ini nga jeep.’ Dira ko mapungko sa iya likod kag magdaho sang mga plete sang pasahero, para indi matalupangdan sang driver nga wala ako nakabayad. Indi ko ina guisto, brothers and sisters, [pero] wala ako sang mahimo.”

Sa pihak sini tanan, ginpasalamatan ni Jerson ang iya iloy nga amo ang nagtudlo sa iya nga mangin malapit sa Simbahan halin sa bata pa lamang nga edad.

Halin sang Grade 3 tubtub nakatapos sa college, nag-serbe si Jerson sa Simbahan bilang isa ka acólito, lector, myembro sang choir, kag katapo sang lain-lain nga mga organisasyon.

Mangin sa iya pag-eskwela, napamatud-an ni Jerson nga wala siya ginapabay-an sang Ginuo sang ginpa-istar siya, gintatap, kag ginpakaon sang pamilya nga indi man niya mga himata.

Nag-apply man siya nga mangin scholar sang Jaro Archdiocesan Social Action Center. Ika-pito siya sa listahan, apang lima lamang ang ginkuha.

“Pero sin-o bala ang makapakot sa plano sang Diyos? Pagligad sang pila ka adlaw, nagtawag sa akon ang JASAC, madugang pa kuno sila duha ka scholars. Gani nga nakasulod ako,” suno kay Jerson. Dugang sini: “Ang Ginuo gid nagapanghikot sa akon kabuhi.”

Subong, isa na ka Certified Public Accountant (CPA) si Jerson, may kaugalingon na nga accounting firm, kag may kaugalingon na nga mga propiedad, apang nagapabilin siya sa pagserbe sa simbahan. Ginakabig niya ini nga panugod sang iya misyon nga amo ang pagbulig man sa iban nga nagakinahanglan.

“Sang ginbalikdan ko ini tanan, nabinag-binag ko, samtang naga-antos ako sa kabuhi, ginahulma ako sang Ginuo sa sulod sang Iya balay. Ginahanda Niya ako, kag nagpadala siya sang mga tawo,” dugang niya sa iya nga repleksyon.

Pahayag pa sini: “Ang akon byahe, natapos na. Subong, akon naman turno, ang turno nga mangin kaayuhan sa iban, kay ako mismo ebidensya nga kun ang Ginuo yara sa imo, matapos mo gid.”#