Nagawangal ang mga taxi drivers sa Iloilo City bangud nga ginaagaw na sang Grab drivers ang ila mga pasahero kag palangabuhian.
Sa interview sang Bombo Radyo kay Wilmar Lopez, iya ginpahayag nga haluson na ini makaginansya sa iya nga byahe bangud tuman ka malaka gid ang mga pasahero.
Suno sa iya, dako nga disbentaha para sa ila ang operasyon sang mga Grab cars bangud kun kinahanglan pa sang mga taxi nga maglibot sa mga dalanon kag mag-usik sang gatong, ang mga Grab cars naman ang nagahulat na lang sang pag-book sang pasahero antes sila maggwa sa dalanon.
Bangud sini, halos manglaghap siya sa pagpangita sang gamiton nga pangbakal sang kinahanglanon sa ila balay bangud indi gid makaigo ang iya kita sa pagbyahe sang taxi.
