ILOILO CITY- Under detention sa gihapon ang status sang tennis star nga si Novak Djokovic samtang nagahulat sang resulta sang iya appeal batok sa iya visa cancellation sa Australia matapos ini gin- block nga makasulod sa amo nga pungsod.
Resulta ini sang desisyon sang Australian Border Force nga i- deport ang World Number 1 tennis star matapos nag-abot sa Australia nga may ginauyatan nga medical exemption gikan sa Covid-19 vaccination rules nga mag-compete sa tournament apang wala ginbaton sang border officials ang amo nga medical exemption.
Nahibaluan nga kinahanglan nga fully vaccinated ang players nga magapasakop sa tournament kag requirement man ini sa tanan nga travellers nga magasulod sa amo nga pungsod.
Suno kay Bombo International Correspondent Denmark Suede direkta sa Australia, isa si Australian Prime Minister Scott Morrison nga nanindugan nga indi dapat paghatagan sang special treatment ang Serbian tennis star nga magsulod sa pungsod nga nagapatuman sang isa sa pinaka-istrikto nga border restrictions.
Magalawig naman tubtob sa Lunes ang iya detention kag ini ang nagabutang sa iya sa alang -alang nga madepensahan ang iya Australian Open title kun indi magpabor ang desisyon sa iya.
Nahibaluan nga ang hotel kun sa diin gin-detain si Djokovic amo man ang ginagamit sang Australian government sa pag- detain sang refugees kag asylum-seekers.
