Ginlaragway sang tournament director sang National Bank Open nga si Karl Hale nga wala sang kaangay ang nangin epekto ni Filipina tennis sensation Alex Eala sa 2026 tournament sa Toronto, Canada.
Suno pa sa Direktor nga nakabulig ang pagkabantog ni Eala agud makahimo sang pinasahi nga ”atmosphere” nga wala pa sini makita sa nasambit nga syudad.
Pahayag pa ni Hale nga padayon ang kasikatan ni Eala kag naglab-ot na sa pinakamataas nga bahin sa Toronto kun sa diin sold out ang tanan sini nga tournament.
Gindayaw man ni Hale ang Filipina tennis star bangud sa malapit sini nga koneksyon sa mga tagasuporta sini sa amo nga pungsod.
Nakit-an man sini ang pagdamo sang mga international fans nga makit-an sa venue kag tuman ini kadamo kun ikumpara sa mga nagliligad nga tinuig.
Dugang pa ni Hale nga nangin importante nga leksyon ang epekto ni Eala para sa mga organizer agud mas mapalapit kag mas ma-engganyo pa ang nagkalain-lain nga komunidad sa Toronto sa mga masunod pa nga National Bank Open.
Nahibaluan nga magasugod na ang kampanya ni Eala sa 2026 Cincinnati Open sa Ohio, USA subong nga adlaw.
Una nga assignment ni Alex si Elena-Gabriela Ruse sang Romania nga nag-abante sa Round of 64 matapos pierdihon si Magda Linette sang Poland.
Nakakuha naman sang bye ang 17th seed nga si Eala para makapadayon sa next round.
