Nagtakop na ang training sessions sang Electoral Boards sa Western Visayas bilang preparasyon sa nagahilapit nga May 2025 Midterm Elections.
Sa interview sang Bombo Radyo kay Atty. Dennis Ausan, Director sang Commission on Elections (Comelec) Region 6, iya ginpahayag nga kadam-an sa mga electoral boards ang mga beterano na nga nagapartisipar sa mga nagliligad nga eleksyon.
Suno kay Ausan, nagserbe na lang nga refresher course ang training sa diin ginasiguro nga updated sa bag-o nga protocols kag teknolohiya ang mga electoral boards.
Importante ang katungdanan sang Electoral Board sa electoral process bangud sila ang nagasiguro nga tayuyon kag nagasunod sa pagsulundan ang voting procedures.
Dugang pa sang natungdan, may yara sang benepisyo nga mabaton ang electoral boards para sa 2025 midterm elections.
Ang Chairperson sang Electoral Board ang makabaton sang P12,000 nga honorarium samtang P11,000 naman para sa Poll Clerk kag Third Member.
Dugang pa sang natungdan, may yara sang gin-certify ang Department of Science and Technology (DOST) sang indi magnubo sa isa ka poll worker sa kada clustered precinct bilang IT-capable nga amo ang maga-manage maayo sa technical aspects sang voting kag counting processes.
Nahibaluan nga ang eleksyon ang natalana sa Mayo 12, 2025 sa diin magabukas ang polling stations halin las singko sang aga tubtob las siete sang gab-i.
