Ginkumpirma ni US President Donald Trump nga pirmado na sang Estados Unidos kag sang Iran ang memorandum of understanding agud nga untaton na ang gyera kag buksan na liwat ang Strait of Hormuz.
Ginpahayag ini ni Trump sa iya pag-abot sa France para sa summit sang G7 group.
Ang iya kumpirmasyon ang kasunod sang pahayag sang senior US administration officials nga may virtual signing na sang agreement kun sa diin ang nagpirma para sa US amo sanday Trump kag Vice President JD Vance samtang ang nagpirma naman para sa Iran amo si Parliament Speaker Mohammad Bagher Ghalibaf.
Wala pa ginsapubliko ni Trump ang kopya sang kasugtanan apang posible suno sa iya nga ipaguwa ini pagkatapos na sang pormal nga signing ceremony sa Geneva, Switzerland sa Byernes.
Isa ka oras lang ang kalayuon sang Geneva sa summit venue sang Evian-les-Bains sa French Alps kun sa diin yara ang G7 leaders, apang nagaguwa sa inisyal nga impormasyon nga indi na magtambong si Trump.
Suno pa sa US leader, “partially open” na subong ang Strait of Hormuz nga amo ang alagyan sang mga barko nga tatlo ka bulan nga ginbalabagan kag nangin rason sang economic disruption sa madamo nga mga pungsod.
Sa idalom sang kasugtanan sang US kag Iran, palawigon ang ceasefire sang 60 pa ka adlaw para nga may tyempo ang duha ka kampo nga mag-negosyar sang mga detalye para sa final agreement.
Kun basehan naman si Iranian President Masoud Pezeshkian, importante para sa ila ang memorandum of understanding agud nga tapuson na ang gyera kag umpisahan ang mga negosasyon, apang gin-athag sini nga wala pa nakumpleto ang final agreement.
“The agreement reached is a significant step towards halting the war and initiating negotiations, and a final agreement has not yet been formalized,” suno kay Pezeshkian sa iya post sa X.
Nagpahayag ini nga preparado ang Iran sa tanan nga mga opsyon bisan nga wala man ang agreement.
Pahayag pa sini, ang memorandum amo ang resulta sang binulan nga diskusyon kag mga follow-up. Kun may mga probisyon suno sa iya nga mapatuman sang husto, makonsiderar ini nga “honorable document” para sa Iran.#
