Pormal na nga ginhingyo sa Kamara nga imbestigaran ang indi otorisado nga fund transfers kag deductions halin sa mga accounts sa bantog nga e-wallet platform nga GCash.
Gin-file ni House Deputy Minority Leader Bernadette Herrera ang House Resolution No. 963 bangud ginpahayag sini nga indi siya kumporme sa nagalain-lain nga statement sang GCash kasunod sang makaduluda nga mga transaksyon.
Ginduso sang mamalidha nga paatubangon sa Kamara ang mga tiglawas halin sa amo nga platform agud nga mapaathag ang unauthorized deductions nga ginkaalarma sang mga nagagamit sang app.
Sa amo nga resolution, hingyuon man ang rekomendasyon nagikan sa mga ahensya sang gobyerno kaangay sang Bangko Sentral ng Pilipinas, Department of Trade and Industry, kag National Privacy Commission.
Una na nga nagpaathag ang GCash nga ang rason sang amo nga makaduluda nga mga transaksyon amo ang fraudster nga nakapang-kuha sang impormasyon halin sa customer paagi sa link nga gin-send sa ila.
Ginpanindugan man sang mobile wallet platform nga wala sang hacking nga natabo, kag indi magdangat sa 1,000 lamang ang naapektuhan sa 81 million users sang GCash. #
