ILOILO CITY- Nagpasalig ang Iloilo City Police Office nga wala sang may ginatago nga impormasyon ang kapulisan kaangot sa natabo nga twin shooting incident sa syudad sang Iloilo sang Enero 19.
Ini matapos nga ginpahayag ni Atty Joseph Celis, director sang National Police Commission 6, nga dapat nga mangin transparent ang Iloilo City Police Office ilabi na ang gin-tukod nga Special Investigation Task Force sa mga update sa kaso sang mga napatay nga sanday Allain Muller kag Delfin Britanico.
Sa interview sang Bombo Radyo kay PCapt Shella Mae Sangrines, tagpamaba sang Iloilo City Police Office, iya ginpahayag nga ang tanan nga mga impormasyon nga ginapa-gwa sang Special Investigation Task Force sa publiko ang validated kag may back-up nga mga ebidensya.
Suno pa kay Sangrines, ang mga impormasyon nga gina-tugyan sa ila sang publiko ang gina-validate sang task force.
Dugang pa sang natungdan, kun may yara sang mga impormasyon nga dapat nga mahibaluan ang publiko, ipahibalo ini gilayon sang otoridad.
Gin-athag man sang natungdan nga gina apresyar gid sang Iloilo City Police Office ang pahayag ni Celis.
