Nagpasugot ang Iran kag ang Estados Unidos sang Amerika sa duha ka semana nga conditional ceasefire kasunod sang pagpatunga sang Pakistan.
Bangud sang intervention sang key mediator, nag-anunsyo si US President Donald Trump nga gina-suspend sini anay ang ultimatum nga iya ginhatag kag ipaiway man sini anay ang pagbomba sa Iran sa sulod sang duha ka semana.
Gin-post ni Trump ang iya desisyon nga ipaiway ang gyera masobra isa ka oras ang nabilin antes ang self-imposed 8pm Eastern time deadline nga amo ang iya ginhatag sa Tehran.
“This will be a double sided CEASEFIRE!” pahayag sang US President. “The reason for doing so is that we have already met and exceeded all Military objectives, and are very far along with a definitive Agreement concerning Longterm PEACE with Iran, and PEACE in the Middle East.”
Sa bahin sang Iran, nag-anunsyo ini nga paagyon nila nga hilway sa katalagman ang mga barko sa Strait of Hormuz sa sulod sang duha ka semana samtang padayon ang dayalogo sa Estados Unidos sang Amerika para nga tapuson na ang gyera sa Middle East.
Sa una nga tion halin sang Pebrero 28 sang nagsugod ang gyera, talalupangdon nga ini ang una nga tion nga ginkumpirma sang Iran nga may istoryahanay gid man nga nagakatabo para nga untaton na ang inaway.
Antes sini, pila ka beses sini nga nagsiling nga wala sang negosasyon — baliskad sa gina-claim ni Trump nga may negosasyon kaupod sa masaligan nga senior officials sang Tehran.
Espesyal nga na-mensyonar sa statement sang Iran ang panikasog sang Pakistan nga amo ang key mediator ukon ang nagpanguna sa pagpatunga sa magkaaway nga nasyon.
“If attacks against Iran are halted, our powerful armed forces will cease their defensive operations,” suno pa sa Minister of Foreign Affairs sang Islamic Republic of Iran.
“For a period of two weeks, safe passage through the Strait of Hormuz will be possible via coordinating with Iran’s Armed Forces,” dugang pa sang opisyal sa official statement nga gin-repost man ni Trump.
Antes ini nga kasugtanan, nag-post pa kagab-i si Trump (pasado alas otso sa gab-i oras sa Pilipinas) nga panason sini ang bilog nga sibilisasyon sang Iran kun wala pa gid sang negosasyon.#
Photo: Majid Saeedi/Getty Images
