Ginpanindugan sang Estados Unidos sang Amerika nga wala ini sang kaangtanan sa anuman nga opensiba sa Iran bangud ang panawagan sini amo ang pagpahagan-hagan sang gamo sa Middle East.
Suno ini kay US Secretary of State Antony Blinken matapos ang gin-report nga pagpalupad sang Israel sang missile sa teritoryo sang Iran bilang balos sa masobra 300 ka drones kag missiles nga ginpalupad man sang Iran sa Israel sang nagligad nga weekend.
Wala pa sang opisyal nga komento nga ginpaguwa ang Israel, apang kun basehan ang statement sang Iran, na-shut down sang ila nga air defense systems ang tatlo ka drones sa probinsya sang Ishafan sang Byernes sang kaagahon.
Ang Ishafan amo ang lugar kun sa diin may daku nga airbase ang Iran ukon ang major missile production complex kag pila man ka nuclear facilities.
Wala sang gin-report nga kahalitan, apang nagapadayon ang imbestigasyon kun sa diin halin ang drones kag kun sin-o ang sa likod sang pagpang-atake.
May Iranian officials man nga nagpahayag nga wala na sang plano nga magtimalos pa ang Tehran.
Sa pagtapos naman sang meeting sa Group of Seven (G7) sa Italya, ginklaro ni Blinken nga wala sang involvement ang Amerika sa anuman nga offensive operation apang nagpamalibad na ini nga magkomento kun bala napaandaman ang Amerika kaangot sa amo nga strike.
Apisar sini, nagpahayag naman si Italian Foreign Minister Antonio Tajani nga nagsiling ang Amerika sa G7 foreign ministers nga nakabaton ini sang “last minute” information kaangot sa matabo nga pagpang-atake sa Iran.
Pila man government agencies sa Estados Unidos sang Amerika ang nagpamalibad sa pagkomento sa amo nga atake kasunod sang gina-alegar mandu sang Biden administration nga maghipos kaangot sa isyu. #
