ILOILO – Mahimo tunaan sang heart attack, stroke kag iban pa nga makamamatay nga balatian ang paggamit sang vape ukon electric cigarettes.
Sa interview sang Bombo Radyo kay John Richard Lapascua, Senior Head Program Officer sang Department of Health 6 iya ginpahayag nga ang vape ukon electric cigarette ang kaangay man sang isa ka normal nga sigarilyo bangud may yara man ini sang nicotine content nga nagapanubo sang blood pressure sang user kag ini ang nagaresulta sa posibilidad nga pag angkon sang heart attack, lung cancer kag iban pa nga makamamatay nga balatian.
Suno kay Lapascua, nagakadapat lang nga mas pasangkaron sang gobyerno ang pagduso sang ordinansa nga nagadumili sa pagpanigarilyo ukon paggamit sang vape kag electric cigarette sa mga pampubliko nga lugar.
Dugang sang natungdan, nagakadapat man nga mag dihon sang mga polisiya agud mangin pormal ang pagdumili ukon pagban sa paggamit sang vape sa bilog nga pungsod.
Nagpanugyan si Lapascua sa mga pumuluyo nga kun mahimo likawan nalang ang paggamit sang sigarilyo kag vape kag maglikaw man sa mga nagagamit sini bangud may yara ini sang dako nga epekto sa aton nga ikaayong lawas.
