Gin-athag ni Iloilo City Vice Mayor Lady Julie Grace ‘Love’ Baronda nga indi obligasyon sang iya opisina nga maghatag sang snacks sa kada may session ang Iloilo City Council.
Sa interview sang Bombo Radyo sa bise-alkalde, iya ginpahayag nga halin sang una, wala sang pondo nga gin-alokar para sa ila nga pamahaw.
“Of course, ang pondo tani sa snacks, it could have been given to other purposeful nga nami nga inisyatibo nga para sa pumuluyo sang syudad,” suno kay Baronda.
Dugang sini, wala sila ginatugutan nga magpain sang budget para sa snacks bangud may yara sila sang RATA ukon Representation and Allowance / Transportation Allowance.
“Gina-disallow ina sang Commission on Audit (COA) nga mapa-budget ka sang pagkaon para sa imo opisina. It’s not the obligation of the City Vice Mayor. I don’t know where that news or that information came from, but then again, indi ina siya matuod nga obligasyon sang isa ka City Vice Mayor,” dugang sini.
Nag-ugat ang isyu matapos nakuhaan sang video sa session sa City Council subong nga semana ang pagbawi sang tinapay nga ginhatag kay City Councilor Sheen Marie Mabilog nga kaalyado ni Baronda.
Una na nagsabat si Mabilog nga naga-diet siya kag wala niya ginakabig nga daku nga isyu ukon big deal ang amo nga pagbawi sang snack.
Gin-athag man ni Mabilog nga wala sila sang official assignment kun sin-o ang magahatag sang pamahaw kada session, kag wala man siya sang ideya kun sin-o ang nagapadumala sini bangud naga-focus lamang siya sa pagpamati sa session.
Sa pagpangusisa man sang Bombo Radyo, ginapahayag nga si Liga ng mga Barangay President Irene Ong ang na-assign nga mag-provide sang pamahaw sang amo nga adlaw.
Sang na-post ang amo nga video sa official Facebook page sang Bombo Radyo Iloilo, nanuhay-tuhay ang komento nga nabaton lakip na ang nagsiling nga base sa impormasyon, ang vice mayor ang dapat nga mag-provide sang pagkaon, apang dugang sang netizen, nagagamit na lamang sang kaugalingon nga kwarta ang mga konsehal bangud wala sang ginahatag nga snacks ang bise alkalde.#
