Wala sang salig si Vice President Sara Duterte pati sa pulis kag sa korte.
Ini ang ginpahayag niya samtang nagapanindugan kaina nga indi siya magsulod sa Quezon City Hall of Justice kun wala ang presensya sang media.
10:48 sang aga sang nag-abot si Duterte agud nga magpyansa sa three counts sang grave threats matapos nga nag-release ang Regional Trial Court sang arrest warrant kahapon sang hapon.
Masobra 30 minutos pa ang nakaligad sang nagpasugot na gid man ang vice president nga magsaka sa ibabaw.
“Hinarass nila ‘yung lugar kung nasaan ‘yung nanay ko at tsaka ‘yung anak ko. Saan ako pupunta? Mag-bail ako, hindi titigil ‘yung harassment. Hindi ako mag-bail, pupunta ako sa pulis. Wala akong tiwala sa pulis, wala nga akong tiwala sa korte,” suno pa sa vice president.
Ginareklamo man sini nga sa pamatyagan niya, indi siya safe, bangud madamo ang pulis sa area.
Makit-an sa video nga yara sa iya atubang ang iya mga abogado lakip na si Atty. Michael Poa nga nagapaathag sa iya, apang gina-insister sang vice president nga dapat wala sang gap sa tunga niya kag sang mga katapo sang media.
“Sinong sasagot kapag namatay ako mamayang gabi? Sinong mananagot? Siyempre, maghuhugas-kamay lang ’yung pulis, make it look like an accident, maghuhugas-kamay lang ‘yung judge. I do not feel safe at all, kahit anong gawin ko,” pahayag sini.
Sa statement sini nga gin-release kaina, gina-insister man sini nga sa iya pamatyagan, ipapatay siya.
“I have documented threats and harassment since 2023. I fear for my children. I do not feel they are safe if I am with them,” suno sa iya statement nga ginpadala sa media. “Umalis na nga ako kung nasaan mga anak ko para pumunta sa korte pero pumunta pa rin ang pulis. I do not feel safe. Pakiramdam ko papatayin nila ako.”
P360,000 ang kinahanglan nga pyansa para sa tatlo ka counts sang amo nga kaso.
Nag-ugat ang kaso sa pahayag ni Duterte sa iya press conference sang Nobyembre 23, 2024 nga kun may malain nga matabo sa iya, may tawo na siya nga nakontak agud nga patyon si President Bongbong Marcos, First Lady Liza Marcos, kag former House Speaker Martin Romualdez.
