Napaslawan ang kampo ni Vice President Sara Duterte nga magpadulong sa Quezon City Regional Trial Court sang byernes nga adlaw, matapos ang gin-isyu batok sa iya nga arrest warrant.
May kaangtanan ini sa nakit-an nga probable cause ukon nagakaigo nga ebidensya batok sa iya sa idalom sang three counts of grave threats kaangot sa Cybercrime Prevention Act matapos ang ginapahayag nga plano sini nga assassination kanday President Ferdinand “Bongbong” Marcos Jr., First Lady Liza Araneta-Marcos, kag former Speaker Martin Romualdez.
Nagpadulong ang mga kapulisan sa korte, ginpreparar ang backdrop para sa mugshot, apang wala gid boluntaryo nga nagpakita ang bise presidente.
Apisar sini, ginklaro sang abogado ni Duterte nga si Atty. Paul Lawrence Lim nga wala sang plano si VP Sara nga magpalagyo sa layi kun sa diin gamitun lamang sang ila kampo ang tanan nga legal remedies sa kaso sini nga may kabilugan nga ₱360,000 nga piyansa.
Nahibaluan nga nagpasa sang mosyon ang kampo ni Duterte sa Quezon City Regional Trial Court Branch 98 nga i-defer ukon i-recall ang arrest warrant, apang wala ini ginpahanugutan sang korte.
Madumduman nga Department of Justice amo ang nagfile sang nasambit nga kaso sa opisyal.
Sa subong, ginkumpirma sang mga awtoridad ilabi na ni National Bureau of Investigation Director Melvin Matibag nga preparado gid sila sa pag-aresto sa ikaduha sa pinakamataas nga opiyal sang pungsod subong nga may ara sang gindagdag nga warrant of arrest batok sa iya.
