Ginpasalig ni United States Secretary of Defense Lloyd Austin kay President Ferdinand “Bongbong” Marcos Jr. nga handa sa tanan nga tion ang Amerika agud depensahan ang Pilpinas pag-abot sa isyu sa teritoryo sa West Philippine Sea kag sa iban pa nga rehiyon.
Suno kay Austin, wala sang pagluya ang commitment ni US President Joe Biden nga protektahan ang Pilipinas.
Gin-mensyonar sini ang 1951 Mutual Defense Treaty kun sa diin nadala diri suno kay Austin ang pagdepensa sang Amerika kun may armado nga pagpang-atake sa pwersa militar, coast guard vessels, public vessels, ukon aircraft sang duha ka pungsod sa Pacific lakip na sa area sa West Philippine Sea.
“So make no mistake Mr. President, we will always have your back in the South China Sea or elsewhere in the region,” pahayag pa sang American defense official.
May yara pa sang lauman nga dugang nga diskusyon para sa alyansa sang duha ka pungsod, ilabi na bangud may gindugang nga sites sa Pilipinas sa idalom sang Enhanced Defense Cooperation Agreement (EDCA).
Nahibaluan nga sa pag-abot ni Marcos sa Pentagon para magpakigkita kay Austin, ginsugata ini sang full honors ceremony.
Nakit-an man sa amo nga seremonya sa Department of Defense grounds sanday Justice Secretary Jesus Crispin Remulla, Environment Secretary Antonia Yulo-Loyzaga, kag Informations Secretary Ivan John Uy. ##
