Tinguhaan sang Western Visayas nga malab-ot ang ginahandum nga pinaka-una nga pwesto sa Palarong Pambansa 2025.
Ini paagi sa masobra 600 ka mga atleta nga ginpadala sang Rehiyon VI sa Laoag, Ilocos Norte agud magpasakop sa nagkalain-lain nga sports events.
Madumduman nga halin sa second place finish sang 2023, nag-us-os ang Western Visayas sa ikatatlo nga pwesto sang 2024 sa Cebu City.
Ang kinahanglan nga lutuson sang mga atleta sang rehiyon agud nga malab-ot ang target nga korona amo ang National Capital Region (NCR) nga nakakuha sang ila ika-17 nga korona sa Palarong Pambansa sang nagligad nga tuig.
Sa interview sang Bombo Radyo kay Mr. Hernani Escullar, spokesperson sang Department of Education Region VI, iya ginpahayag nga magluwas sa preparasyon sang rehiyon, mangin unique ang partisipasyon sang Western Visayas subong nga tuig bangud duha ka regional directors ang maga-oversee sa WV Regional Athletic Association.
Ini amo sanday DepEd Region VI OIC Director Dr. Cristito A. Eco, kag si Negros Island Region Director Dr. Ramir Uytico nga halin man diri anay sa Region VI.
Bangud na-ulihi na na-establisar ang DepEd NIR, maga-upod anay ang delegates sang Negros Occidental sa Panay kag Guimaras subong nga tuig. Maragtason ini bangud ini na ang katapusan nga tuig nga makaupod pa ang Negros Occidental sa delegasyon sang Region VI.
Magluwas sa 608 athletes, may 152 coaches, assistant coaches, kag chaperones; 249 committee members, kag anum ka honorary members nga ginpadala ang Western Visayas para sa amo nga daku nga hinampang.#
(Screengrab from DepEd Western Visayas/FB)
