Ginpakamalaot sang mga world leaders ang nangin desisyon ni US President Donald Trump nga temporaryo nga untaton ang paghatag sang pondo sa World Health Organization.
Ini bangud sa ginapahayag indi maayo nga pag-uyat nila sang isyu may kaangtanan sa COVID-19 nga problema subong sang bilog nga kalibutan.
Suno kay United Nations Secretary-General Antonio Guteres, indi ini ang tion agud buhinan ang resources sang mga operasyon sang World Health Organization.
Sa baylo nga ini kuntani ang tion nga maghugpong ang international community agud batuan ang paglapta sang makamamatay nga virus.
Wala man napunggan ni New Zealand Prime Minister Jacinda Ardern nga ipabutyag ang iya pagkadismaya sa nangin lihok sang Republican presidente.
Suno kay Ardern, mas kinahanglan subong sang tanan nga pungsod sang insakto kag konkreto nga impormasyon nga gikan sa World Health Organization bangud sa ila lang nakabase ang mga pagsulundan nga ginapatuman sang nagkalain-lain nga pungsod sa bilog nga kalibutan.
