Naka-istoryanay sanday President Ferdinand “Bongbong” Marcos Jr. kag US Vice President Kamala Harris kadungan sang 43rd Association of Southeast Asian Nations (ASEAN) Summit sa Jakarta, Indonesia.
Suno sa White House, lakip sa gindiskusyunan sang duha amo ang maritime security environment sa West Philippine Sea kag ginpaagyan man sang review ang mga oportunidad nga maga-pabaskog ang bilateral maritime cooperation.
Pareho man nga gin-abi-abi sang duha ka lider ang pagtumod sang apat ka dugang nga sites sa Pilipinas nga mahimo ma-access sang armadong kusog sang Amerika sa idalom sang Enhanced Defense Cooperation Agreement ukon EDCA.
Lakip man sa gin-istoryahan amo ang bilateral economic cooperation sa tunga sang duha ka pungsod.
Ginpahayag naman ni Philippine Ambassador to Washington DC Jose Manuel “Babes” Romualdez nga ang US kag Japan ang nagapangita man sang tyempo nga makapatigayon sang trilateral meeting kaupod kay Marcos samtang nga nagapadayon ang amo nga summit.
Sanday Marcos kag Harris ang pareho nga naka-schedule nga magbiya na sa Indonesia subong nga Huwebes.
Sang Mayo 2023, matandaan nga may meeting man sanday Marcos, Harris, kag US President Joe Biden sa Washington samtang nagpadulong naman si Harris diri sang Pilipinas sang Nobyembre 2022. #
See Translation
